O VERÍN ROMPE A MALDICIÓN DO SÁBADO DE ENTROIDO

Crónica CD RAMIRÁS 0 - VERÍN CF 3. 

22ª xornada de Liga da Primeira Autonómica Galega (grupo IV).

Foto Martiño Pinal para La Región.

O Verín CF cumpriu cos pronósticos e venceu en Santa Isabel con claridade a un bo CD Ramirás que se complica a permanencia na Primeira Autonómica.

FICHA TÉCNICA

Polo CD Ramirás xogaron Kevin, Cristian Pérez, Carlos, Carmelo (Mauro, min. 71), Sierra, Germán, Jacobo, Diome, José Luis, Iván e David (Víctor Manuel, min. 80).

Polo Verín CF xogaron Piollo, Cote, Xurxo, Mario, Padín, Iago Garrido (David Lopezosa, min. 71), Diego Soto, Eloy (Capelas, min. 56), Pablo García (Pablo Roca, min. 68), Luisito e Fran Martínez.

Arbitrou Claudio Cerdeira Casas, asistido nas bandas por Daniel García Casillas e Iván Gómez Míguez. Amosou cartóns amarelos a Carlos e Cristian Pérez, do CD Ramirás, e a Eloy, do Verín CF.

CRÓNICA

Saiu con desparpaxo o CD Ramirás, tentando levar a iniciativa, mais na primeira chegada dos verinenses, no minuto 4, Fran Martínez, que cuallaría un gran partido, subiu o 0-1 nun remate cruzado, tras unha rápida combinación. O tempraneiro gol non frenou o entusiasmo dos locais, cun xogo que non refletía os seus apuros clasificatorios. Pero o Verín CF controlou ben as acometidas, na busca de asestar un golpe definitivo. Diego Soto, cun bo cabezazo tras centro de Pablo García, e Fran Martínez, nunha boa xogada individual, puideron dar ese golpe, mais o marcador permaneceu 0-1 ó chegar ó descanso.

Na segunda metade os locais, con ánimos renovados, procuraron o empate, mais o Verín CF non deu opción, volvendo marcar no minuto 56, esta vez por medio de Xurxo, de cabeza tras un centro dende a esquerda. Co 0-2, o CD Ramirás veuse definitivamente abaixo, e xa non tardou demasiado (min. 66) Luis Ossorio en subir o terceiro ó marcador, cun disparo raso, aproveitando un desborde de Fran Martínez e o posterior cabeceo ó segundo palo de Pablo García. Non tivo máis historia o partido. O Verín CF rompe a maldición de Entroido e sube ata os 50 puntos, firme no seu asalto ás prazas de ascenso.
 

DOUS PENALTIS EN CONTRA SENTENCIAN Ó VERÍN CF EN TABOADELA.

Crónica UP TABOADELA 3 - VERÍN CF 2. 

24ª xornada de Liga da Primeira Autonómica Galega (grupo IV).

Caeu no Outeiro do Miogo o Verín CF, nun partido no que puxo o fútbol, e os locais o pragmatismo dos goles. Ós verinenses só lles queda o consuelo de ter gañado o goalaverage en caso de empate final cos de Taboadela.

FICHA TÉCNICA

Pola UP Taboadela xogaron Álex, Gil, Brais (Joel, min. 87), Moure, Oliveira, Dieguito, Alfonso (Martín Losada, min. 67), Bruno (Pablo Suárez, min. 78), Jorge Menor, Diego Álvarez (Rebollo, min. 59) e Camba (Diego Fernández, min. 89).

Polo Verín CF xogaron Jorge, Pablo García, Xurxo, Mario, Padín (Pablo Roca, min. 78), Iago Garrido, Diego Soto, Eloy (David Ginzo, min. 25), Luisito, Fran Martínez e Quini Cotarelo.  

Arbitrou José Manuel Fernández Cid, auxiliado nas bandas por Abel Moure Álvarez e José Manuel Martínez Pérez. Amonestou con cartón amarelo, da UP Taboadela, a Diego Álvarez, Alfonso e Joel, e do Verín CF, a Jorge, David Ginzo e Pablo Roca.

CRÓNICA

Barría forte o vento o Outeiro do Miogo cando comezou o partido, coma unha premonición do vendaval futbolístico que viría a continuación, porque nun cuarto de hora, o marcador xa sinalaba un 2-1 para os locais. No minuto 6, o Verín CF golpeou na súa primeira aproximación por mediación de Quini Cotarelo, o conectar un disparo perfecto tras revolverse con moita calidade na frontal da área. Lastimosamente, de inmediato, no minuto 8, Dieguito empatou para a UP Taboadela tras penalti cometido por Jorge a Gil. E sen tempo a asimilar o empate, no 13 era Camba o que, tras gañarlle a partida a Xurxo, batía cun zurdazo cruzado ó gardarredes verinense, subindo o 2-1 ó marcador. 

Véndose tan pronto por debaixo no marcador, Iván González reaccionou dando entrada a David Ginzo por Eloy, para adiantar a Mario á posición de extremo esquerdo. O Verín CF conseguiu facerse dono claro do balón, tocando con criterio e levando perigo, especialmente a través de Fran Martínez, que se atopou en dúas ocasións coa gran intervención de Álex. Finalmente o premio do empate chegou no minuto 40, cando Luisito transformaba no minuto 40 un penalti por man de Alfonso.

Tras esta emocionantísima primeira parte, a UP Taboadela retrasou sen miramentos as súas posicións, tentando conter as acometidas visitantes mentres esperaba algún balón longo do que tirar proveito. O Verín CF sobou a pelota como quixo e abriu ben o campo coas incorporacións en ataque de Mario pola esquerda e Pablo García pola dereita, pero non acabou de pór en apretos a meta de Álex, ben defendido polos seus compañeiros. Finalmente, foi a UP Taboadela quen atopou petróleo nunha xogada na área verinense, ó sinalar o colexiado penalti por man nun salto de Pablo Roca, que entrara uns minutos antes por Padín. Volveu marcar Dieguito e a partir daí, os restantes intentos do Verín CF por restablecer a igualada foron estériles. Dous penaltis en contra foron demasiados como para levar un resultado positivo do Outeiro do Miogo. A única boa nova foi alomenos o feito de ter o goalaverage a favor con respecto á UP Taboadela, que favorecerá ós verinenses en caso dun empate a puntos ó final da competición. Agora só queda esquecer canto antes esta derrota e seguir adiante: o CD Ramirás agarda este sábado.

VICTORIA CÓMODA ANTE O ATLÉTICO VILARIÑO (4-0)

Crónica VERÍN CF 2 - SD ARRABALDO 1. 

23ª xornada de Liga da Primeira Autonómica Galega (grupo IV).

Cómodo triunfo onte do Verín CF, no “exilio” da Granxa. Os verinenses viron o camiño achandado xa nos primeiros minutos, tras un gol en propia porta dos visitantes. Ó final, Luisito, con dous tantos, e Fran Martínez, redondearon a goleada.

FICHA TÉCNICA

Polo Verín CF xogaron Piollo, Pablo Roca (Cote, min. 59), David Ginzo (Fran Martínez, min. 59), Xurxo, Padín (Diego Soto, min. 55), Iago Garrido (Dani Capelas, min. 76), Luis Vilachá, Luisito, Miguel Rivera (Mario, min. 55) e Quini Cotarelo. 

Polo Atlético Vilariño xogaron Palo, Manolito, Adrián Blanco, Puga (Dani Failde, min. 53), Prada, Miguel Ángel, Benito (Cristian Fernández, min. 70), Quique Lorenzo, Álex González, Enri (Hidalgo, min. 59) e Poli.

Arbitrou Jorge Guedella González, auxiliado nas bandas por Iago Sumavielle Rodríguez e Rubén González Rodríguez. Amonestou con cartón amarelo, do Verín CF, a Quini Cotarelo, Pablo Roca e Luisito, e do Atlético Vilariño, a Cristian Fernández.

CRÓNICA

Venceu o Verín CF nun partido sen moita historia, ante un rival, o Atlético Vilariño, que xogou co gran hándicap de non ter a ningún dos seus gardarredes na convocatoria (Palo, un central, foi o encargado de defender a portería). Con semellante dificultade, e co 0-4 sufrido en Vilariño na primeira volta na memoria, os visitantes saíron ó campo da Granxa sen ter a convicción de poder arrincar un resultado positivo. Tras un primer aviso de Miguel Rivera –onte titular-, ós seis minutos o Verín CF xa se puso por diante, mercede a un gol en propia porta de Quique Lorenzo ó tentar despexar un saque de falta. Os de Vilariño non tiveron reacción e o Verín CF, con vantaxe no marcador, tocou con comodidade, deixando que a propia inercia do xogo o levase á victoria final. No minuto 37 apareceu Luisito, que dende que regresou á competición amosa un espectacular fame de balón, para firmar o segundo gol, cun disparo duro que non blocou Palo. Co 2-0 chegouse ó descanso.

Na reanudación xogou o Verín CF o seu mellor fútbol combinativo e acumulou ocasións, a máis clara unha de Luisito ó longueiro no minuto 53. Entre o 55 e o 59 Iván González cambiou substancialmente o equipo, ó entraren a xogar Cote, Mario, Diego Soto e Fran Martínez, sen que variase en absoluto o guion do partido. No 69, cun enorme zambombazo de falta directa, Luisito fixo o terceiro. Dominaba a pracer o Verín CF, e, con todo o peixe vendido, os xogadores de ámbolos dous equipos xa pensaban na ducha en vestiarios cando Fran Martínez aproveitou unha indecisión da zaga e do gardarredes para subir o cuarto ó marcador. Pouco despois os visitantes puideron marcar o gol da honriña por medio dun tiro lonxano de Cristian Fernández, pero Piollo estirouse o necesario para evitar que o marcador se movera. Pitou o colexiado o final, e abandoaron o terreo de xogo uns e outros, o Verín CF coa satisfacción do deber cumprido, o Atlético Vilariño co alivio de non ter recibido un maior correctivo dadas as circunstancias, e a tranquilidade ó fin e ó cabo de que esta liga, a dos aspirantes ó ascenso, non é a súa.

SUFRIDO TRIUNFO E VOLTA A POSTOS DE ASCENSO

Crónica VERÍN CF 2 - SD ARRABALDO 1. 

21ª xornada de Liga da Primeira Autonómica Galega (grupo IV).

Non xogaron o seu mellor partido os verinenses ante o colista SD Arrabaldo, e sufriron do lindo para gañar. O premio, non obstante, foi grande, pois o Verín CF, beneficiado polo resto de resultados da xornada, volve a postos de ascenso.

FICHA TÉCNICA

Polo Verín CF xogaron Piollo, Cote, David Ginzo, Mario, Padín, Iago Garrido, Diego Soto (Eloy, min. 62), Dani Capelas (Hugo, min. 70), Luisito (David Lopezosa, min. 89), Pablo García e Quini Cotarelo (Pablo Roca, min. 87). 

Pola SD Arrabaldo xogaron Hugo Lorenzo, Pereiras, Borja Sas, Adrián González, Pablo Delgado (Dani Gil, min. 73), Óscar, Gustavo, David Lago (Pablo Otero, min. 55), Jose Novoa (Arias, min. 89), Hugo González (Veleiro, min. 86) e Diego Novoa (Borja García, min. 59).                

Arbitrou Claudio Cerdeira Casas, auxiliado nas bandas por Pablo Cid Menor e David Fernández Queija. Amonestou con cartón amarelo, do Verín CF, a Padín e Mario, e da SD Arrabaldo, a Gustavo, Diego Novoa, Óscar, Pablo Otero, Borja Sas e Jose Novoa. Foron expulsados con cartón vermello directo no minuto 77 Pablo García (Verín CF) e Borja García (SD Arrabaldo) no minuto 84.

Gardouse un minuto de silencio antes do inicio do partido en memoria de Luis Aragonés.

CRÓNICA

Semellaba unha tarde plácida a que se presentaba onte no Arjiz; alomenos, non tan complicada coma finalmente sucedeu. O visitante, a modesta SD Arrabaldo, faroliño vermello da táboa, que só acadara un punto coma visitante en toda a temporada, cumpriu co seu papel e limitouse a protexer a súa portería dos ataques verinenses o mellor que puido. Pero as súas esperanzas duraron pouco, porque xa no minuto 17, despois de dous avisos de Luis Ossorio, o Verín CF adiantábase no marcador, por medio de Quini Cotarelo, un seguro de gol nesta temporada. Aínda sen a lucidez doutras tardes, os verinenses mandaban no partido e no marcador, e acumularon ocasións suficientes para pechar anticipadamente o encontro. Moi activo por banda, Pablo García rompía con facilidade a defensa e provocaba accións de perigo que non acabaron de materializarse. Dani Capelas, no minuto 26, tivo a ocasión máis clara para subir o 2-0 ó marcador, pero o seu disparo foise á cruceta.

Co 1-0 chegou o descanso, e a sensación equívoca de que o traballo estaba feito. Máis na reanudación, os verinenses contaxiáronse da falta de ritmo dos seus rivais e xogaron de xeito máis espeso, con menos velocidade nas súas accións, que convertíanse así en máis previsibles. O partido durmiuse ata que no minuto 65 o espertou de golpe Hugo González, que resolveu ben un barullo na área verinense. O empate, nunha xogada aillada, sorprendeu a propios e estranos. Abel Afonso, ó fronte do banquiño en ausencia de Iván González, introduciu no 70 a Hugo en lugar de Dani Capelas buscando máis frescura e clarividencia ofensiva. Quedaban aínda vinte minutos por diante para acadar o gol da victoria, pero as precipitacións e as dúbidas ían en aumento, e aínda se torceron máis as cousas coa expulsión de Pablo García no minuto 77, que deixaba ós verinenses en inferioridade numérica. A sombra dun empate inesperado ante o equipo último clasificado sobrevoou o Arjiz, pero foi novamente Quini Cotarelo o que apareceu no minuto 83 para cambiar o destino do partido, ó provocar un penalti que transformaba Luisito. Quedou a SD Arrabaldo con dez xogadores, e respiraron os siareiros ó volver a igualdade numérica. Mais o susto foi de órdago no tempo de desconto, cando outro barullo na área á saída dun córner acabou co balón estrelándose no poste da portería de Piollo. Puido ser o 2-2 pero o pitido do colexiado certificou a fin do partido, o triunfo do Verín CF e a volta a postos de ascenso.

EMPATE NUN PARTIDO DE ALTERNATIVAS (2-2)

Crónica CD ALLARIZ 2 - VERÍN CF 2. 

20ª xornada de Liga da Primeira Autonómica Galega (grupo IV).

Gran partido o de onte en Allariz, entretido e con goles. Certamente sabe a pouco o punto obtido, mais o CD Allariz, equipo moi serio, amosou tamén por qué só leva catro derrotas en liga. Con todo, por ocasións puideron gañar os verinenses, máis faltoulles un chisco de sorte para levarse o partido.

FICHA TÉCNICA

Polo CD Allariz xogaron Adrián Canal, Miguel Fernández, Bernardo (Muñiz, min. 46), Diego Barreiros, Antonio Elías, Coello (Carlos Elías, min. 61), Iván Costa (Macía, min. 85), Beto (Blanco, min. 69), Juan Gallego, Paco Arias e Sergio Fernández.

Polo Verín CF xogaron Jorge, Cote (David Ginzo, min. 73), Pablo Roca, Xurxo, Mario, Diego Soto (Dani Capelas, min. 83), Luis Vilachá, Hugo (Eloy, min. 61), Luisito, Pablo García e Quini Cotarelo. 

Arbitrou Yago Grande García, auxiliado nas bandas por José Mariano Pérez Domínguez e Erea Nogueiras Martínez. Amonestou con cartón amarelo, do CD Allariz, a Diego Barreiros, Coello, Adrián Canal, Bernardo, Tamayo, Miguel Fernández e Muñiz, e do Verín CF, a Pablo Roca.

CRÓNICA

Non estaban aparentemente nin a tarde –moi ventosa- nin o campo –moi pesado- para un gran espectáculo, pero a falta de control do xogo propiciou precisamente un partido moi aberto con moitas alternativas. Os plantexamentos voaron polos aires xa no minuto 4, cando Diego Soto tivo a mala fortuna de marcar en propia porta, tras un saque de banda á área do CD Allariz. Os verinenses foronse con decisión para adiante, e froito dunha boa presión veu unha recuperación na zona de tres cuartos de Pablo García, que se internou na área local ata ser zancadilleado. Penalti que foi executado por Luisito: era o minuto 9 e o marcador xa ía 1-1. O partido continuou con interesantes idas e voltas, das que ningún dos dous equipos sacou proveito. Nas postrimerías do primeiro periodo tivo o Verín CF a mellor ocasión, tras cabalgada por banda de Pablo García, pero o remate de Luisito escupiuno o longueiro.

Trala reanudación, o Verín CF monopolizou o xogo e protagonizou as mellores ocasións. Un córner olímpico de Cote que sacou a defensa baixo os paos, ou un remate de cabeza de Pablo García a centro de Luisito que se foi alto, constituiron o preludio do golazo de Luisito (minuto 69), unha auténtica obra de arte: o extremo controlou co peito de espaldas, e sen deixar caer o balón, disparou con chilena dende fóra da área batendo a un atónito Adrián Canal. Meteu Iván González a David Ginzo no campo para gañar contundencia defensiva, pero o CD Allariz no minuto 75 atopou petróleo nunha xogada de balón parado. Juan Gallego anticipouse a Jorge na súa saída e marcou a igualada. Non se conformou ningún dos dous equipos co 2-2, e sucedéronse uns últimos quince minutos emocionantísimos de ataques e contrataques. Tivo dúas moi boas o conxunto local: na primeira Jorge despexou de puños un gran disparo de Sergio Fernández tras gran xogada colectiva do CD Allariz, e pouco despois o gardarredes verinense tivo que volver empregarse a fondo co disparo de Paco Arias, tras xogada de estratexia en libre indirecto. E cando xa expiraba o partido, unha dobre ocasión de Dani Capelas e Luisito tras un rápido contrataque non acabou en gol de milagre, gracias ó bo facer de Adrián Canal, que salvou ó seu equipo da derrota. Ó final, o empate deixou máis felices a alaricanos que a verinenses, que si souberon remontar o tempraneiro gol local, pero que finalmente non puideron rematar a faena. O Verín CF segue, despois desta xornada, cuarto na táboa.