EMPATE NUN PARTIDO DE ALTERNATIVAS (2-2)

Crónica CD ALLARIZ 2 - VERÍN CF 2. 

20ª xornada de Liga da Primeira Autonómica Galega (grupo IV).

Gran partido o de onte en Allariz, entretido e con goles. Certamente sabe a pouco o punto obtido, mais o CD Allariz, equipo moi serio, amosou tamén por qué só leva catro derrotas en liga. Con todo, por ocasións puideron gañar os verinenses, máis faltoulles un chisco de sorte para levarse o partido.

FICHA TÉCNICA

Polo CD Allariz xogaron Adrián Canal, Miguel Fernández, Bernardo (Muñiz, min. 46), Diego Barreiros, Antonio Elías, Coello (Carlos Elías, min. 61), Iván Costa (Macía, min. 85), Beto (Blanco, min. 69), Juan Gallego, Paco Arias e Sergio Fernández.

Polo Verín CF xogaron Jorge, Cote (David Ginzo, min. 73), Pablo Roca, Xurxo, Mario, Diego Soto (Dani Capelas, min. 83), Luis Vilachá, Hugo (Eloy, min. 61), Luisito, Pablo García e Quini Cotarelo. 

Arbitrou Yago Grande García, auxiliado nas bandas por José Mariano Pérez Domínguez e Erea Nogueiras Martínez. Amonestou con cartón amarelo, do CD Allariz, a Diego Barreiros, Coello, Adrián Canal, Bernardo, Tamayo, Miguel Fernández e Muñiz, e do Verín CF, a Pablo Roca.

CRÓNICA

Non estaban aparentemente nin a tarde –moi ventosa- nin o campo –moi pesado- para un gran espectáculo, pero a falta de control do xogo propiciou precisamente un partido moi aberto con moitas alternativas. Os plantexamentos voaron polos aires xa no minuto 4, cando Diego Soto tivo a mala fortuna de marcar en propia porta, tras un saque de banda á área do CD Allariz. Os verinenses foronse con decisión para adiante, e froito dunha boa presión veu unha recuperación na zona de tres cuartos de Pablo García, que se internou na área local ata ser zancadilleado. Penalti que foi executado por Luisito: era o minuto 9 e o marcador xa ía 1-1. O partido continuou con interesantes idas e voltas, das que ningún dos dous equipos sacou proveito. Nas postrimerías do primeiro periodo tivo o Verín CF a mellor ocasión, tras cabalgada por banda de Pablo García, pero o remate de Luisito escupiuno o longueiro.

Trala reanudación, o Verín CF monopolizou o xogo e protagonizou as mellores ocasións. Un córner olímpico de Cote que sacou a defensa baixo os paos, ou un remate de cabeza de Pablo García a centro de Luisito que se foi alto, constituiron o preludio do golazo de Luisito (minuto 69), unha auténtica obra de arte: o extremo controlou co peito de espaldas, e sen deixar caer o balón, disparou con chilena dende fóra da área batendo a un atónito Adrián Canal. Meteu Iván González a David Ginzo no campo para gañar contundencia defensiva, pero o CD Allariz no minuto 75 atopou petróleo nunha xogada de balón parado. Juan Gallego anticipouse a Jorge na súa saída e marcou a igualada. Non se conformou ningún dos dous equipos co 2-2, e sucedéronse uns últimos quince minutos emocionantísimos de ataques e contrataques. Tivo dúas moi boas o conxunto local: na primeira Jorge despexou de puños un gran disparo de Sergio Fernández tras gran xogada colectiva do CD Allariz, e pouco despois o gardarredes verinense tivo que volver empregarse a fondo co disparo de Paco Arias, tras xogada de estratexia en libre indirecto. E cando xa expiraba o partido, unha dobre ocasión de Dani Capelas e Luisito tras un rápido contrataque non acabou en gol de milagre, gracias ó bo facer de Adrián Canal, que salvou ó seu equipo da derrota. Ó final, o empate deixou máis felices a alaricanos que a verinenses, que si souberon remontar o tempraneiro gol local, pero que finalmente non puideron rematar a faena. O Verín CF segue, despois desta xornada, cuarto na táboa.

O VERÍN CF LÉVASE O DERBI (2-0)

Crónica VERÍN CF 2 - MONTERREI CF 0. 

19ª xornada de Liga da Primeira Autonómica Galega (grupo IV).

Levouse o Verín CF o derbi do val de Monterrei. Os verinenses xogaron mellor no global do partido e fixéronse xustos acreedores do triunfo, ante un Monterrei CF que competiu ben, pero que non puido loitar contra as circunstancias adversas que se lle presentaron. 

FICHA TÉCNICA

Polo Verín CF xogaron Jorge, Pablo García (Dani Capelas, min. 83), David Ginzo, Xurxo, Mario, Iago Garrido (Eloy, min. 64), Diego Soto, Luis Vilachá (Hugo, min. 67), Luisito (David Lopezosa, min. 80), Fran Martínez (Padín, min. 76) e Quini Cotarelo. 

Polo Monterrei CF xogaron Sueiro, Tractor, Iván Teixeira, Eulogio (Ramón, min. 65), Pedro Rodríguez (Fabián, min. 61), Patxi, Carracedo (Fede, min. 80), Alexandre (Breixo, min. 13), Iago Lantes (Luis Méndez, min. 83), Seo e Iván Rodríguez.

Arbitrou Javier Carid Pérez, auxiliado nas bandas por Cristina Prada Vázquez e Daniel Gomes Oliveira. Amonestou con cartón amarelo, do Verín CF, a Iago Garrido e David Ginzo, e do Monterrei CF, a Iván Rodríguez, Iván Teixeira, Luis Fernández Ares e David Fernández Pérez. O gardarredes Opazo foi expulsado con cartón vermello directo no minuto 58.

Realizaron o saque de honra Jose Manuel Jorge e Fran Adegas, dous mozos que están a loitar por recuperarse dos seus problemas de saúde.

CRÓNICA

Intenso e con doses de polémica, non defraudou o derbi. O Verín CF fixo valer a súa condición de local levando a iniciativa dende os primeiros minutos, especialmente pola esquerda, por medio dun hipermotivado Luisito, que volvía os terreos de xogo tras cumprir a súa sanción. Tivo por certo unha notable actuación o extremo verinense, aínda que se lle notase a inactividade. O Monterrei CF sufriu o seu primeiro contratempo no minuto 13, cando Alexandre, lesionado, tivo que ser sustituido por Breixo. Merced ó seu xogo combinativo, gañaba ós puntos ó partido o Verín CF cando chegou, no minuto 22, unha das xogadas clave do encontro: disparou Luis Vilachá dende a frontal, e o rexeite foi dar a Quini Cotarelo, que en posición adiantada batiu a Sueiro. O liña levantou a bandeira, pero o colexiado interpretou que o toque do defensa habilitaba ó dianteiro verinense, e deu validez ó tanto, entre as protestas dos xogadores e siareiros visitantes. Co tempraneiro 1-0, o Monterrei CF quedou sen resposta, e o bo facer do trivote Garrido-Soto-Vilachá impúxose definitivamente na batalla do medio campo, organizando rápidas accións de ataque ás que se incorporaba con mérito Pablo García dende a súa posición de lateral dereito. No minuto 23 tivo unha gran ocasión Luisito tras pase interior de Fran Martínez, pero a súa vaselina sobre Sueiro sacouna Iván Teixeira baixo paos. Finalmente, no minuto 31, un córner botado por Luisito foi rematado inapelablemente a gol por Quini Cotarelo, que facía así o segundo da súa conta particular. Co Monterrei CF moi tocado, seguiu apretando o Verín CF, pero as ocasións sucesivas do trío de vangarda Luisito-Fran Martínez-Quini non atoparon porta.

Veulle de perlas ó descanso ó Monterrei CF, que, reorganizado e con novos ánimos, conseguiu coller os mandos do partido. No minuto 47 un balón perfecto de Seo foi cabeceado por Pedro, pero o remate foi sacado da escadra por Jorge, nunha extraordinaria estirada. O cancerbeiro verinense tivo que intervir novamente no minuto 56, ante un disparo de falta de Carracedo. Eran os mellores momentos do visitantes, que, non obstante, recibiron un xarro de auga fría ó sufrir a expulsión do seu gardarredes, nunha xogada de contrataque do Verín CF. Deslizouse polo chan Sueiro, tocou o balón coa man fóra da área, e interpretou o árbitro que a acción do porteiro cortara unha ocasión manifesta de gol, amosándolle en consecuencia cartón vermello. As protestas foron inútiles e tivo que entrar no campo Fabián, que se estrenou cunha gran parada ó libre directo de Luisito. Con inferioridade numérica, o Monterrei CF xa non puido facer fronte ó Verín CF, que nos seguintes minutos volveu mandar no xogo e tivo ocasións para ampliar o marcador. Pero entre a falta de tino dos verinenses e o acerto de Fabián e dos seus defensas, o resultado xa non se moveu. O ritmo do partido decaeu definitivamente ata o pitido final do árbitro: o Verín CF sumou tres puntos máis na súa loita polo ascenso; o Monterrei CF pola súa banda saiu do Arjiz derrotado, mais coa cabeza alta.

UN PUNTIÑO NA LIMIA QUE SABE A POUCO.

Crónica ANTELA CF 0 - VERÍN CF 0. 

18ª xornada de Liga da Primeira Autonómica Galega (grupo IV).

Comezou o Verín CF o 2014 gañando un punto en Xinzo, pero perdeu unha boa oportunidade de conquerir a victoria e saltar así á zona de ascenso directo: faltou onte a clarividencia ofensiva doutras tardes e os verinenses non foron quen de superar os limianos, mesmo cando estes quedaron en inferioridade numérica.

FICHA TÉCNICA

Polo Antela CF xogaron Moreiro, Imad (Adrián Rodríguez, min. 64), Iago Campelo, Juan González (Juan Álvarez, min. 67), Samuel (Óscar Cabrera, min. 89), Brais Quintas, Iván Cabrera, Airabella, Rafa Castro (Dani Jardón, min. 79), Marcos Ferreiro e Nacho Feijoo.

Polo Verín CF xogaron Piollo, Cote (David Ginzo, min. 64), Pablo Roca (Padín, min. 77), Xurxo, Mario, Iago Garrido, Dani Capelas (Diego Soto, min. 46), Eloy (Miguel Rivera, min. 64), Pablo García, David Lopezosa (Hugo, min. 46) e Quini Cotarelo. 

Arbitrou Rubén Castro Fernández, auxiliado nas bandas por Iago Sumavielle Rodríguez e Daniel Gomes Oliveira. Amonestou con cartón amarelo, do Antela CF, a Nacho Feijoo, Rafa Castro, Iván Cabrera, Samuel, Imad e Nacho Feijoo (expulsado por dobre amonestación no minuto 57), e do Verín CF, a Dani Capelas, Xurxo, Eloy e Hugo.

CRÓNICA

No primeiro partido da segunda volta, e do 2014, tardou o Verín CF en espertar do descanso navideño, e non cuallou unha boa primeira parte. O Antela CF, moi necesitado de puntos, buscou xogar as súas armas: duros en defensa, tentando deixar os menos ocos posibles, e esperando a ter algunha oportunidade nalgunha xogada aillada. Os verinenses, mermados pola baixa de Luis Vilachá e Fran Martínez, non atoparon lucidez na circulación do balón e só Quini Cotarelo, o home visitante máis incisivo durante o encontro, levou certo perigo á área de Moreiro. Finalmente, foi o Antela CF o que disfrutou da ocasión máis clara do período, no minuto 36, cando o traveseiro escupiu un disparo de Nacho Feijoo, tras desbaratar en primeira instancia Piollo unha xogada persoal de Samuel, en presumible fóra de xogo.  O empate, pódese dicir que xusto, imperou ata o descanso.

A segunda parte foi outra cousa, e xa con Diego Soto e Hugo no campo, o Verín CF fíxose claramente co control do balón. Os limianos remaban contracorrente e foron enchéndose de cartóns, ata que quedaron con dez xogadores con máis de trinta minutos para a conclusión. O Antela CF concentrouse entón en tentar manter o balón o máis lonxe posible da súa portería. O acoso verinense foi continuo, pero infructuoso. No minuto 65 tivo o gol nas botas Pablo García tras gañar Quini Cotarelo liña de fondo, mais o balón non quixo entrar na porta. No 67 cabeceou por riba do longueiro David Ginzo á saída dun córner, e no 77 e 80 foi Quini quen o tentou tamén de cabeza, sen éxito. Faltáballe ó Verín CF un chisco máis de clarividencia en ataque para marcar pero aínda tería Pablo García outra oportunidade, no tempo de desconto, de voltear o destino do partido. Pero non houbo xeito: o Verín CF volveuse de Xinzo cun punto que lle sabe a pouco, mais que de tódolos xeitos lle permite ter o ascenso a só un punto de distancia.