O VERÍN RETORNA A PREFERENTE

Crónica VERÍN CF 5 (Luisito, Quini Cotarelo, Unai e Fran Martínez -dous-) - AD COVADONGA 0.  34ª xornada de Liga da Primeira Autonómica Galega (grupo IV).

O Verín CF xa é equipo de Preferente, trala contundente victoria sobre a AD Covadonga. Saboreu mesmo o título ata o último instante, cando Bruno marcou no tempo do desconto en Velle para facer á SD Nogueira campión. Mais non foi menos a alegría: un ano despois, o ascenso devolve ó Verín CF ó mínimo sitio que por historia e afeción merece.

FICHA TÉCNICA

Polo Verín CF xogaron Piollo (Jorge, min. 77), Pablo García (Cote, min. 46), David Ginzo, Xurxo, Mario, Iago Garrido (Luis Vilachá, min. 68), Diego Soto, Hugo (Fran Martínez, min. 55), Luisito, Unai e Quini Cotarelo (Padín, min. 66).

Pola AD Covadonga xogaron Suso, Chanel, Óscar Gil, Dani (Jhon, min. 35; Miguel, min. 63), Mauro, Zurdo, Cristian, Jhony, Víctor Sotelo, Toni e Alfonso.

Arbitrou Yago Grande García, auxiliado nas bandas por Alba Grande García e Borja Medina Gavilán. Amosou cartón amarelo ós locais Cote, e ós visitantes Óscar Gil e Mauro.

CRÓNICA

Non houbo apenas espazo para os nervios onte no Arjiz: Luisito xa no minuto 9 marcou o primeiro tanto, tras perfecta asistencia de Unai, e en apenas vinte minutos, os verinenses xa ían 3-0, con dous goles máis de Quini Cotarelo e do propio Unai, culminando brillantemente unha preciosa xogada colectiva. Certo é que co 1-0 puido empatar a AD Covadonga, cun balón ó pao de Víctor Sotelo, mais o equipo ourensán, con moitas baixas, non foi rival en ningún momento para un Verín CF moi superior e moito máis motivado, que redondeou a goleada con dous tantos de Fran Martínez, xa na segunda parte. 

Co ascenso no peto, a atención se dirixía a Velle, onde a SD Nogueira non era quen de gañar. Durante máis de 80 minutos o Verín CF foi campión, mais Bruno de falta directa daba in extremis o título ó conxunto da Ribeira Sacra. Non importaba moito; a festa onte no Arjiz foi das que permanecen inalterables na memoria, cunha extraordinaria comunión entre equipo e afeción: xogadores exultantes, presidente e adestrador manteados, ante uns siareiros entregados que enchían as bancadas, vestidas de vermello, e que disfrutaron dun ascenso que devolve ó Verín CF á mínima categoría que merece, por historia e afeción.

AGÓNICO PUNTO QUE SABE A ASCENSO

Crónica SD NOGUEIRA DE RAMUÍN 1 (Cani) - VERÍN CF 1 (Luisito). 

33ª xornada de Liga da Primeira Autonómica Galega (grupo IV).

Coma se o fútbol lle debese algo, onte os astros puxéronse do lado do Verín CF. Nun partido con moitos nervios e con pouco xogo, un gol de penalti cando o partido xa agonizaba permitiulle ó Verín CF igular o marcador e sacar de Nogueira de Ramuín un valiosísimo punto que pode valer un ascenso.

FICHA TÉCNICA

Pola SD Nogueira de Ramuín xogaron Borja, Lorente, Andrés, Patas, Chapi, Caniche, Meleiro, Roberto, Bruno (Chivi, min. 85), Oliveira (Petrovic, min. 86; Lobo, minuto 90) e Hugo.

Polo Verín CF xogaron Jorge, Pablo Roca (Luis Vilachá, min. 72), Padín (Unai, minuto 46), Xurxo, Mario, Iago Garrido (Eloy, minuto 89), Diego Soto, Pablo García, Luisito, Fran e Quini Cotarelo.

Arbitrou Humberto Pereira Muñoz, auxiliado nas bandas por José Daniel Rodicio González e Abraham Pérez Dapia. Amosou cartón amarelo ós locais Meleiro, Patas e Bruno, e ós visitantes Pablo García, Pablo Roca, Mario e Abel Afonso (segundo adestrador). Da SD Nogueira foron expulsados por protestar o adestrador Fran Justo e Dorribo, porteiro suplente.

CRÓNICA

Non se xogaban poucas cousas onte no campo da Tella, e, en consecuencia, o partido comezou con moito respeto mutuo. Viuse enseguida que era tarde de emocións, e non de toque e combinación, e nesas circunstancias foi a SD Nogueira o equipo que se sentiu máis cómodo. O Verín CF non acababa de carburar e non era de quen de tomar a iniciativa que o levara a pór en apuros a meta dos afiadores. Finalmente, a determinación da SD Nogueira tivo premio, e no minuto 38, Cani aproveitou un barullo tras un saque de esquina para batir a Jorge. Era o 1-0, un resultado que, acompañado do 0-0 provisional no Monterrei CF – CD Arenteiro, apartaba ós verinenses do ascenso. 

Iván González comprendeu que o equipo necesitaba un cambio agresivo, e introduciu a un dianteiro –Unai- por un defensa –Padín-. O Verín CF asumiu máis riscos, o partido abriuse máis e aumentaron as chegadas a ambas áreas. Bruno e Oli tiveron sendas ocasións para marcar o segundo, mais os verinenses tiveron máis control de balón, especialmente trala entrada de Luis Vilachá por Pablo Roca –centrocampista por defensa-, cambio no que o Verín CF puña xa toda a carne no asador. 

En Albarellos marcaba o CD Arenteiro o 0-1, e as cousas púñanse definitivamente negras para o Verín CF. Por fortuna, o Monterrei CF conseguía igualar a pouco da conclusión, e unha vez finalizado o encontro no campo de Rozavales, toda a emoción trasladábase a Luintra, onde a SD Nogueira seguía a gañar, mentres os verinenses sentían cada vez máis a presión do reloxio. Corría xa o minuto 89, xa os locais festexaban o título ligueiro, cando o Verín CF, nun último arranque de fe, mandou o balón á área local. Un barullo, unha man inoportuna, e un penalti sinalado e transformado por Luisito cambiaron o sino do partido e pode que do campionato, porque o Verín CF, por obra e gracia dese gol agónico, multiplica as súas opcións de ascenso, e pode mesmo proclamarse campión se fai os deberes ante a AD Covadonga e a SD Nogueira de Ramuín non gaña en Velle na derradeira xornada. A explosión de xúbilo visitante foi comparable só a do partido en Oira ante a Ponte Ourense CF, cando Xurxo marcou tamén de xeito agónico o gol da victoria, gol que marcou un punto de inflexión na traxectoria do equipo. Mentres os verinenses desataban a súa euforia, a frustración local desembocou en airadas protestas e dúas expulsións no banquiño: a SD Nogueira nun segundo pasaba de ter nas mans o título de Liga a complicarse o ascenso. Os derradeiros instantes do partido, dilatados pola aparatoso golpe do exverinense Petrovich nun choque fortuito, foron dunha extraordinaria tensión dentro e fóra do terreo de xogo. Por fin, pitou o árbitro para pór fin a este carrusel de emocións. O Verín CF xogarase o ascenso -e pode que o título de campión-, na casa ante os seus siareiros na xornada definitiva.

O VERÍN CF NON DÁ TREGUA

Crónica VERÍN CF 5 - POLÍGONO SAN CIBRAO CF 0. 

32ª xornada de Liga da Primeira Autonómica Galega (grupo IV).

Na imaxe, Iván González e Luisito celebrando o primeiro tanto.

O Verín CF é un ciclón que arrasa ó seu paso. Onte a víctima foi un voluntarioso Polígono San Cibrao, que claudicou nunha primorosa segunda parte dos verinenses.

FICHA TÉCNICA

Polo Verín CF xogaron Piollo, Pablo Roca (David Ginzo, min. 63), Xurxo (Padín, min. 63), Mario, Iago Garrido, Luis Vilachá (Unai, min. 51), Diego Soto, Pablo García, Fran Martínez (Hugo, min. 66), Luisito e Quini Cotarelo.

Polo Polígono San Cibrao CF xogaron Héctor, Saúl Quntairos (Alejandro Díaz, min. 46), Cumbrado (Noé, min. 71), Diego Canal, Rubén Villamarín (Sueiro, min. 46), Paredes, Outeiriño, Yago, Anxo Regal, Varandela (Ángel García, min. 62) e Gustavo (Ángel Pérez, min. 64).

Arbitrou Alberto Ruibal Santos. Amosou cartón amarelo a Diego Canal (Polígono) e ó adestrador Iván González (Verín CF).

CRÓNICA

O Verín CF gústase nesta situación de extrema tensión que é a pechadísima loita polo ascenso. Dende a derrota no Arjiz 0-1 ante o CD Arenteiro, os verinenses levan sete triunfos consecutivos, nos que marcou 28 goles e recibiu somentes 3. Uns números apabullantes que son xusto reflexo do compromiso colectivo e a calidade individual deste equipo. Onte foi o Polígono San Cibrao quen caeu con outra goleada, se ben hai que dicir que o equipo industrial plantou cara durante o primeiro tempo, ben posicionado no campo, neutralizando os intentos verinenses, que non acababan de concretarse. Os visitantes deron mesmo un bo susto no minuto 28, cando Outeiriño puido adiantar ós visitantes, pero Piollo acabou rexeitando con solvencia o seu disparo. Finalmente, coma premio ó equipo que máis e mellor tentara ir pola victoria, foi Luisito no minuto 35, cun gol de falta directa marca da casa, quen desnivelou o marcador e abriu a senda do triunfo.

Tralo decanso, o Verín CF saiu disposto a sentenciar. E desta volta foi Pablo García, no minuto 54, cunha gran galopada polo carril dereito, quen fixo o 2-0, coa involuntaria colaboración dun defensa. Co tanto, as esperanzas de puntuar dos de San Cibrao esvaecéronse, e o Verín CF aproveitou o baixón anímico dos visitantes para asediar a portería rival. Pouco a pouco foron caendo os tantos. Unai amosou que volve estar en forma trala súa inactividade con dous goles, similares os dous, tras aproveitar os espazos e encarar con éxito o porteiro do Polígono, especialmente no 4-0, acadado tras unha preciosa vaselina que levantou ós siareiros das súas bancadas. Finalmente foi Quini Cotarelo –antes de ter que xogar de lateral dereito trala lesión de Pablo García no 83- quen pechou a conta goleadora con outro gol de vaselina, que fixo o quinto e definitivo. Tras este sétimo triunfo consecutivo, o Verín CF encara o difícil compromiso en Nogueira de Ramuín –penúltima xornada de Liga- no seu mellor momento de xogo, e cun ánimo inquebrantable.

UN VERÍN CF DE RÉCORD CONQUISTA OS CARRÍS (1-3).

Crónica UD BARBADÁS B 1 - VERÍN CF 3. 

31ª xornada de Liga da Primeira Autonómica Galega (grupo IV).

Ante un Barbadás B reforzado con xogadores habituais nas convocatorias do primeiro equipo en Terceira, o Verín CF amosou onte nos Carrís competitividade, sacrificio e acerto anotador, ingredientes que o levaron a unha merecida victoria. Á espera do resto dos resultados dos equipos implicados no ascenso, o Verín CF acada o liderato provisional.

FICHA TÉCNICA
 
Pola UD Barbdás B xogaron Carlos, Javi Quevedo, Vilachá, Iago Quintairos, Aitor, Cuquejo (Noel Sueiro, min. 60), Alberto (Jua Suárez, min. 46, Sergio Nogueiras, min. 59), Padrón, Quique, Juanma e Ismael.
 
Polo Verín CF xogaron Jorge, Pablo Roca, Xurxo, Padín (Fran Martínez, min. 56), Mario, Iago Garrido, Eloy (Luis Vilachá, min. 49), Diego Soto, Pablo García (David Ginzo, min. 88), Luisito (Hugo, min. 65) e Quini Cotarelo (Unai, min. 80).

Arbitrou Juan Alberto Vázquez, asistido nas bandas por Cristina Prada Vázquez e Yago Casas Blanco. Amosou cartón amarelo a Padrón, da UD Barbadás B, e a Eloy, Padín e ó adestrador Iván González, do Verín CF.

CRÓNICA

Saiu a UD Barbadás B moi forte, con gañas de agradar ó seu público, e coa axuda engadida de contar con Iago Quintairos, Cuquejo e Quique, caras habituais no primeiro equipo azulón. Este último xogador, de gran mobilidade, obrigou ós verinenses a xogaren moi concentrados e esforzárense nas axudas defensivas. Juanma, de libre directo, e Padrón, probaron fortuna sobre a meta de Jorge, mais pasados os primeiros quince minutos de agobio inicial, o Verín CF conseguiu contrarrestar o empuxe local e comezou fabricar accións de perigo. No minuto 24 Luisito tivo a primeira boa ocasión verinense, e no 27, Pablo García batiu a Carlos tras un gran roubo de balón por banda e internada ata a área barbadense. Noqueou o gol ós locais, porque no minuto 29, un córner botado por Luisito foi rematado de cabeza á rede no primeiro pao por Quini Cotarelo, que segue o seu impresionante idilio co gol. Cun 0-2 en media hora, o Verín CF tiña franco o camiño da victoria, que cristalizou no primeiro minuto do segundo periodo, cun remate de Xurxo na área tras templar con calma pasmosa outro córner de Luisito e fusilar logo inapelable a Carlos. A intensidade do Verín CF dáballe o triunfo e o liderato provisional, e nada nos restantes corenta e cinco minutos de partido puxo en perigo o premio dos tres puntos, nin sequera o gol de Aitor, no minuto 67, tras un bo centro de Juan, que supuxo o tanto da honriña para os locais. Para os visitantes, unha nova victoria en liga, a sexta consecutiva en Liga. Dezaoito puntos consecutivos que refliten a gran madurez en tódolos aspectos do xogo deste Verín CF que quere entrar por todo o alto á Preferente Autonómica.

O VERÍN CF CUMPRE ANTE O AT. BARBANTES (3-0) E XA TEN A TIRO O LIDERATO.

Crónica VERÍN CF 3 - AT. BARBANTES 0. 

30ª xornada de Liga da Primeira Autonómica Galega (grupo IV).

Na imaxe, Luisito celebrando o primeiro gol.

A Primeira Autonómica ponse de infarto. Onte o Verín CF cumpriu derrotando ó Atlético Barbantes nun plácido partido, mentres, no Espiñedo, a SD Nogueira gañaba a domicilio ó CD Arenteiro. O resultado, tres equipos en dous puntos: as última catro xornadas de liga non van ser aptas para siareiros con problemas cardíacos.

FICHA TÉCNICA
 
Polo Verín CF xogaron Jorge, Pablo García, Pablo Roca, Xurxo (Padín, min. 70), Mario (David Ginzo, min. 70), Iago Garrido (Unai, min. 60), Luis Vilachá, Diego Soto (Hugo, min. 71), Luisito, Fran Martínez (Eloy, min. 65) e Quini Cotarelo.
 
Polo At. Barbantes xogaron Heri, Rocky, Jaime, Diego Viñas, Chino, Toni, Bulicas, Fredy, Alén (Samuel, min. 86), Miguel (Fleky, min. 76) e Víctor.
 
Arbitrou Jorge Guedella González, asistido nas bandas por Yago Casas Blanco e Borja Medina Gavilán.
Nos prolegómenos do partido fíxose unha homenaxe a José Manuel Ferreira, campión nacional de wu-shu.

CRÓNICA

O Atlético Barbantes, coa permanencia xa no peto, e co 1-6 do partido da primeira volta na lembranza, visitaba o Arjiz preocupado en esencia de non encaixar unha derrota severa. Foi un partido brando, como amosa o feito de que o colexiado non tivese necesidade de sacar cartón a ningún xogador. O Verín CF, obrigado a gañar, tomouse o seu tempo e foi cociñando o partido a fogo lento. Chegaban pouco a pouco as oportunidades, por medio especialmente de Luisito e Fran, pero durante a primeira media hora, a orde defensiva e o bo facer de Heri baixo paos bastoulles ós barbantinos para manter a súa porta inmaculada. Mais no minuto 34, Luisito non quixo dar motivos de preocupación ós siareiros, e marcou un golazo dende a esquerda sen ángulo apenas para o disparo, despois de varios rexeites da defensa visitante. 

O Verín CF xa tiña o partido na man, e corroborouno co 2-0, acadado no primeiro minuto do segundo tempo, nunha excelente xogada que iniciou Mario pola esquerda, e continuou logo Fran cunha gran asistencia que Luisito aproveitou para marcar o segundo da súa conta particular. Co partido asegurado, Iván González comezou as rotacións. Unai saltou ó campo no minuto 60, en medio dunha gran ovación: o retorno do dianteiro tras seis meses -aínda que lle falte un punto de forma para estar ó seu nivel-, é unha gran nova para o equipo verinense. Probou fortuna por certo o rubio nun bo disparo, mais foi Quini Cotarelo quen deu sinais de que o Verín CF ía polo gol da sentencia. Avisou no minuto 64 cun gran zurdazo que despexou Heri, e no 66 rematou de cabeza ás mallas un centro de Luisito. Era o 3-0, e a partir daí, o Verín CF velou armas, pensando xa no partido de Copa en Melias do Xoves Santo. O vindeiro domingo, de Resurrección, non haberá Liga. Os tres equipos aspirantes ó ascenso terán tempo pois de repousar e atacar o tramo final de campionato con tódalas forzas que lles queden. O CD Arenteiro é lider, pero está envolto nunha dinámica negativa –catro partidos sen gañar- que propiciou que a SD Nogueira se sitúe a un punto, e o Verín CF a tan só dous puntos. Por diante catro xornadas e doce puntos en xogo.

LUISITO ILUMINA O CAMIÑO EN VELLE

Crónica CD VELLE 0 - VERÍN CF 1. 

29ª xornada de Liga da Primeira Autonómica Galega (grupo IV).

O Verín CF sumou o seu cuarto triunfo consecutivo, non sen sufrimento, porque o CD Velle puxo as cousas moi difíciles, especialmente na primeira parte. Finalmente Luisito, de falta directa, marcou o gol da victoria, un impresionante tanto que valeu para gañar o partido, e que pode valer un ascenso.

FICHA TÉCNICA

Polo CD Velle xogaron Carlos, Davicín, Oscarillo (Antonio Varela, min. 46), Petón (Babarro, min. 76), Soso, Casi, Borja Varela (Marcos Álvarez, min. 50), Alex Alonso (Kevin, min. 67), Cristian Blanco, Efrén e David Araújo.
 
Polo Verín CF xogaron Jorge, Pablo Roca, David Ginzo (Eloy, min. 70), Xurxo, Mario, Luis Vilachá (Iago Garrido, min. 76), Diego Soto, Pablo García, Luisito (Miguel Rivera, min. 89), Fran Martínez e Quini Cotarelo.
 
Arbitrou Juan Alberto Vázquez Martínez, asistido nas bandas por Diego Janeiro Martínez e Diego Rodríguez Iglesias. Amonestou a Marcos Álvarez e David González, do CD Velle, e a Luis Vilachá, Xurxo, Mario e Eloy, do Verín CF.

CRÓNICA

Enfrontábanse os verinenses no céspede do Monte da Aira a un dos equipos máis en forma da competición, e a primeira parte encargouse de amosalo. Luis Vilachá disfrutou da primeira oportunidade do partido, mais o CD Velle, cun xogo moi intenso e unha gran presión, facilitada polas reducidas dimensións do campo, foi quen de desarticular o xogo verinense e mesmo pór en perigo a meta de Jorge, especialmente por medio de Soso. No minuto 14, tras unha indecisión defensiva, o dianteiro rematou ó pao, e novamente o CD Velle volveuse atopar coa madeira, no minuto 22, tras un barullo na área verinense. Tivo nestes momentos o Verín CF a sorte dos gañadores, e a partir do minuto 25, o partido equilibrouse, sen que ningún dos dous equipos puidera pór en apretos ó gardarredes contrario. Iso si, no desconto do primeiro periodo houbo polémica tras unha caída de Fran Martínez na área local, mais o colexiado non a considerou pena máxima.

Na segunda parte o adestrador do CD Velle quixo dosificar o esforzo dos seus xogadores, mentres o Verín CF saía pola súa banda moito máis entonado, máis semellante ó equipo dominador das últimas semanas. Foi Luisito quen atopou con máis claridade as fisuras no entramado defensivo local, e en cinco minutos tivo tres ocasións de gol. A resposta do CD Velle só chegaba a balón parado, e segundo pasaba o tempo, tanto física coma tácticamente os verinenses amosaron máis e máis superioridade. Os ourensáns víronse obrigados a cometer máis faltas, e o Verín CF soubo sacar bo rédito delas, porque no minuto 86, Luisito coronou o seu gran partido cun extraordinario gol de libre directo dende 35 metros que se colou, con forza e colocado, pola escadra de Carlos. O Verín CF puido sentenciar por medio dun man a man de Quini Cotarelo no minuto 89, mais o 0-1 xa non se moveu do marcador. Os verinenses salvaban así unha complicadísima visita, e seguen a pór presión ós seus rivais directos, que, atención, xogan entre si a vindeira xornada.

O VERÍN CF REPITE GOLEADA ANTE O SPORTING CELANOVA (7-0)

Crónica VERÍN CF 7 - SPORTING CELANOVA 0. 

28ª xornada de Liga da Primeira Autonómica Galega (grupo IV).

O Verín CF persegue o ascenso coma un lobo famélico. Onte tampouco tivo piedade do Sporting Celanova, a quen endosou outra goleada, esta vez favorecida polo feito de que os celanovenses quedaran en inferioridade numérica dende o minuto 32 da primeira parte. Os verinenses xa están a un punto da SD Nogueira de Ramuín.

FICHA TÉCNICA

Polo Verín CF xogaron Piollo (Jorge, min. 75), Pablo García, Xurxo (Cote, min. 55), Mario (Eloy, min. 52), Padín (Pablo Roca, min. 46), Iago Garrido (Hugo, min. 46), Diego Soto, Luis Vilachá, Luisito, Fran Martínez e Quini Cotarelos.

Polo Sporting Celanova xogaron Ismael, Iván Domínguez (Codeso, min. 75), Abelardo, Fabio (Gastón, min. 38), Jorge Domínguez (Diego Fernández, min. 46), Cacheiro (Viso, min. 33), Rubén Pérez (Germán, min. 50), Luis Alberto, David Vázquez, Teo e Lucas Nieto.

Arbitrou Adrián Dacal Rodríguez, asistido nas bandas por Alba Grande García e Vanesa Abadín González. Amosou cartóns amarelos a Padín, do Verín CF, e do Sporting Celanova a Iván Domínguez, Jorge Domínguez e Abelardo, expulsado con vermella directa no minuto 32 da primeira parte.

CRÓNICA

Chegaba o Sporting Celanova ó Arjiz para probar se a goleada da semana pasada sobre o Boado FC fora un accidente, ou o verdadeiro reflexo dun equipo que está a alcanzar neste treito de temporada a súa mellor forma física e mental. O Sporting, coidadoso en non dar a máis mínima facilidade, saiu moi ben plantado, e os verinenses tiveron dificultades para superar o entramado defensivo visitante. Con todo, Luisito en dúas accións deu mostras de perigo, o mesmo que Quini Cotarelo, cun remate de cabeza a centro de Pablo García. No minuto 26, finalmente, apareceu a calidade de Fran Martínez para desnivelar o choque e pór en ventaxa ó Verín CF, cun gran disparo dende o borde da área que superou a Ismael. Poñíaselles custa arriba o partido ó Sporting, e moito máis cando no minuto 32 o árbitro viu man de Lucas Nieto nunha acción na área; o xogador viu cartón vermello directo, Luisito encargouse da pena máxima e non errou. 

Despois, xa houbo un antes e un despois trala xogada do penalti: co 2-0 e un home menos, o Sporting Celanova veuse derrotado, e perdeu toda orde defensiva. Neste contexto, os homes de Iván González uliron sangue, e en menos de dez minutos subiron outros dos goles ó marcador, por medio de Quini Cotarelo, a centro de Pablo García (min. 35) e Diego Soto tras gran xogada colectiva (min. 42). O partido marchou ó descanso cun demoledor 4-0 no marcador, que invitou a Iván González a introducir cambios na segunda parte (entraron Pablo Roca, Hugo, Eloy e Cote) para repartir minutos e protagonismo entre os seus xogadores. Mais non cesou o instinto depredador dos verinenses, que anotaron outras tres dianas neste periodo, por medio de Quini Cotarelo (min. 48), Pablo Roca (min. 67) e Fran Martínez (min. 89), ata pór o definitivo 7-0 no marcador. O Verín CF definitivamente asusta, e tras esta xornada a súa presa está máis cerca.

O VERÍN CF DESATA A SÚA ARTILLERÍA ANTE O BOADO FC

Crónica VERÍN CF 8 - BOADO FC 0. 

27ª xornada de Liga da Primeira Autonómica Galega (grupo IV).

O Verín CF foi unha apisonadora onte no Arjiz. O Boado FC foi desarbolado dende o primeiro minuto polo xogo e a eficacia goleadora dos verinenses, que seguen metendo presión á SD Nogueira de Ramuín na loita polo ascenso.

FICHA TÉCNICA

Polo Verín CF xogaron Jorge, Cote (Dani Capelas, min. 46), Pablo Roca (Luis Vilachá, min. 46), David Ginzo (Padín, min. 59), Mario, Diego Soto, Miguel Rivera, Pablo García, Luisito (Eloy, min. 59), Quini Cotarelo e Fran Martínez (Hugo, min. 52).

Polo Boado FC xogaron Otxo, Iván Morgade (Jorge Miranda, min. 46), Bolaño (Colega, min. 65), Pisto, Iago, Pablo García, Pablo Currás, Xotas, Pek (Johny, min. 46), Vila e Iván Míguez.

Arbitrou Marcos Fernández Fernández, asistido nas bandas por Erea Nogueiras Martínez e Vanesa Abadín González. Amosou cartóns amarelos a David Ginzo, do Verín CF, e a Pek, Pisto e Pablo García, do Boado FC. 

Gardouse un minuto de silencio pola morte do expresidente Adolfo Suárez.

CRÓNICA

Saiu o Verín CF con moitas gañas, e abofé que non tardou moito en desfacer o empate a ceros inicial. Despois dun par de boas ocasións que xa anunciaban a superioridade do xogo local, foi Luisito no minuto 8 quen perforou a meta de Otxo, tras asistencia de Pablo García. Os verinenses buscaban ben as espaldas dos defensas unha e outra vez, provocando estragos na defensa limiana, que non achaba o modo de pechar os espazos. No minuto 11 invertíronse os papeis e foi Luisito quen asistiu a Pablo García, para que este fixese o segundo. O Arjiz facíaselles enorme ós de Boado, e as ocasións seguiron chegando, aínda que non foi ata o minuto 39 que David Ginzo, de cabeza á saída dun córner, fixo o terceiro, que adicou ó seu tío, recentemente falecido. Os visitantes, sabéndose derrotados de xeito tan prematuro, respiraron con alivio ó escoitar o pitido que anunciaba o descanso. 

Na segunda parte, cun marcador tan claro, Iván González optou por repartir protagonismo entre os seus xogadores, e Dani Capelas, Luis Vilachá, Padín, Eloy e Hugo entraron no campo case de xeito consecutivo. Cambiaron as pezas, mais non o panorama, e o Boado FC non puido invertir a tendencia do partido, nin frear a fame de gol de Quini Cotarelo, que xa se postula para pichichi da categoría. Marcou este no minuto 48 e no 49, pondo o 5-0. E fixo Hugo o sexto, no minuto 66. Os visitantes tiveron no minuto 75 a súa ocasión para facer o gol da honriña, pero Jorge reaccionou ben ó disparo de Vila. Despois o Verín CF sumou dous tantos máis –Quini de penalty no min. 79, e novamente Hugo de gran vaselina no 82- antes de que finalizara a agonía do Boado FC, que queda tocado na súa batalla por eludir o descenso. O Verín CF mentres tanto suma tres puntos máis, e envía con esta sonora goleada unha mensaxe clara ós seus rivais: a máquina verinense está ben engraxada e non cederá nin un ápice na súa motivación nin na súa fe por obter o premio final.

A FE LEVA Ó VERÍN CF A UNHA VALIOSÍSIMA VICTORIA EN OIRA

Crónica PONTE OURENSE CF 0 - VERÍN CF 1. 

26ª xornada de Liga da Primeira Autonómica Galega (grupo IV).

                                                                               Foto de Jesús Regal para Faro de Vigo.

O Verín CF obtivo o sábado en Oira un triunfo agónico, pero que recompensou o seu bo xogo e a súa fe inquebrantable. A derrota ante o CD Arenteiro na xornada anterior non mermou a motivación dos verinenses, que empurraron ata o último suspiro ata obter uns merecidísmos tres puntos que poñen ó equipo na senda do ascenso.

FICHA TÉCNICA

Pola Ponte Ourense CF xogaron Rubén (Sotelo, min. 46), Viqueira, Castro, Manu Domínguez, Adrián Viana, Salgado, Chaudarcas, Iván González (Álex, min. 76), Dani Pérez (Moisés, min. 71), Joel (Xavi Roldán, min. 58) e Gabi (Eleazar, min. 81).

Polo Verín CF xogaron Jorge, Pablo Roca, David Ginzo, Xurxo, Padín, Eloy (Hugo, min. 67), Iago Garrido (Pablo García, min. 50), Diego Soto, Luisito (Cote, min. 88; Dani Capelas, min. 89), Quini Cotarelo e Fran Martínez.

Arbitrou Claudio Cerdeira Casas, asistido nas bandas por Karin Rúas Barrosa e José Manuel Da Silva Márquez. Amosou cartóns amarelos a Moisés, da Ponte Ourense CF, e a Luisito e Iago Garrido, do Verín CF. O adestrador Iván González foi expulsado no 88 por dobre amarela; o xogador pontino Eleazar con cartón vermello directo no minuto 89.

CRÓNICA

Saiu o Verín CF en Oira consciente do que se xogaba, pero non lle tremeron as pernas ós xogadores verinenses. Mais ben ó contrario: dende o primeiro minuto comezaron mandar no xogo con autoridade, combinando ben entre liñas, e utilizando un xogo directo cando o partido así o requería. Cun medio do campo que gañou en consistencia defensiva e en balance ofensivo coa entrada no once inicial de Eloy, o Verín CF anulou a unha timorata Ponte Ourense CF, que se limitou a soportar as embestidas do seu rival, agardando algunha contra afortunada. Eloy, Luisito, Quini, Fran… tiveron nos seus pés o 0-1, mais Rubén impediuno en varias intervencións de gran mérito. Os minutos pasaban, as ocasións sucedíanse, o gol resistíase. Tivo que tomarse un respiro o Verín CF de tanta intensidade no xogo, e tivo entón no minuto 40 Chaudarcas unha excelente ocasión para pór en ventaxa ó equipo pontino, pero o longueiro escupiu o seu remate dende fóra da área.

Na segunda parte o Verín CF seguiu empurrando, mais pronto (minuto 50) apostou Iván González por Pablo García para gañar profundidade en banda. Pouco máis tarde, Pablo Roca no 65 rematou de cabeza ó pao á saída dun córner. E no minuto 67, o técnico queimou as naves quitando a un mediocampista para pór no campo a Hugo, que xogou de enganche diante dun Diego Soto omnipresente que se multiplicou nos labores de contención e que mesmo se incorporou con perigo en ataque. Volveu sucederse un carrusel de ocasións, en gran medida gracias á verticalidade de Pablo García, que dinamitaba a banda esquerda pontina. No 80 un remate de Diego Soto volveu atoparse coa madeira da portería local. O gol non chegaba, mais o Verín CF non perdeu a fe, ata que finalmente, no minuto 88, un centro de Pablo Roca foi cabeceado impecablemente por Xurxo á rede. A explosión de alegría no banquiño do Verín CF foi tal que o adestrador percorreu 50 metros para celebrar o tanto no céspede cos seus xogadores. Pouco lle importou que o colexiado lle quitara o segundo cartón amarelo e o mandase a vestiarios: o ansiado gol ben pagaba a pena. A Ponte Ourense CF, con dez homes trala expulsión de Eleazar, quixo morder nun arranque de orgullo a base dun par de balóns longos, mais nin Felipe nin Moisés atinaron coa porta de Jorge: o fútbol desta volta foi finalmente xusto co equipo que máis méritos fixo para levar unha victoria, que por épica, por agónica, sabe mellor que calquera goleada. A SD Nogueira sinte xa o alento do Verín CF na súa nuca.

O CD ARENTEIRO EXERCE DE LÍDER NO ARJIZ (0-1)

Crónica VERÍN CF 0 - CD ARENTEIRO 1. 

25ª xornada de Liga da Primeira Autonómica Galega (grupo IV). 

 

O CD Arenteiro fixo gala do seu excelente estado de forma e levouse tres puntos importantísimos do Arjiz que o catapultan á victoria final no campionato. O seu xogo serio e práctico foi adornado por Marcos Sotelo cunha xenialidade que desequilibrou un partido que foi, en xeral, moi intenso e igualado.

FICHA TÉCNICA

Polo Verín CF xogaron Piollo, Cote (David Ginzo, min. 75), Xurxo, Mario, Padín (Eloy, min. 75), Iago Garrido (Pablo Roca, min. 77), Diego Soto, Pablo García (Dani Capelas, min. 52), Luisito, Quini Cotarelo e Fran Martínez.



Polo CD Arenteiro xogaron Pachi, Carlos, Dabarca, Diego López, Lois, Álex (Omar, min. 80), Marcos Sotelo (Óscar, min. 70), Víctor Gallego, Quiroga (Manu, min. 75), Bardelas e Prada (Walter Martín, min. 67).

Arbitrou Daniel González González, asistido nas bandas por Marcos Sumavielle Rodríguez e Iago Sumavielle Rodríguez. Amosou cartóns amarelos a Mario, Luisito, Diego SOto e Pablo García (Veróin CF), e a Dabarca, Álex, Marcos Sotelo e Omar (CD Arenteiro).

CRÓNICA

Saiu o Verín CF cun once moi ofensivo, con catro homes de clara vocación atacante: Pablo García, Quini Cotarelo, Luisito e Fran Martínez. Pero os de Carballiño, con menos presión polo resultado, presentaron enseguida as súas credenciais de líder tomando o control do xogo. Os verinenses, pasado un dubitativo primeiro cuarto de hora, colléronlle finalmente a medida o partido. Desatouse entón a esperada loita de colosos entre os a priori mellores equipos da categoría, un partido intenso, cun gran derroche físico, e por momentos mesmo moi trabado. Non era fácil combinar para ningún dos dous equipos, pero o Verín CF foi crecendo no partido ata o punto de protagonizar accións de perigo sobre a meta de Pachi. Latigazos sobre todo de Fran Martínez (gol anulado por fóra de xogo no minuto 19) e de Quini Cotarelo, que no minuto 33 puido inaugurar o marcador tras excelente internada na área. Foron os mellores momentos dos locais, pero o CD Arenteiro tamén tivo cara o final deste periodo as súas opcións por medio dun par de accións de contrataque que finalmente resolveron ben entre Piollo e os centrais.

Na segunda parte o partido foi máis aberto, cun ritmo máis fluido. Pero as opcións do Verín CF sufriron un serio revés ó lesionarse no minuto 51 Pablo García, cunha escoradura de nocello que o obrigaba a deixar o partido. Comezou a dominar máis o CD Arenteiro, mais non se prevía un desenlace claro a favor de ningún dos dous equipos ata que, finalmente, no minuto 68, surxiu Marcos Sotelo coma un faro entre a néboa para conectar un zurdazo dende a frontal tras unha fantástica xogada individual. Foi un xarro de auga fría para os verinenses. Aproveitou o CD Arenteiro o shock para facerse definitivamente co control do partido, feito que non variou pese ós cambios introducidos por Iván González. Só o arreón local no tempo de desconto puxo incertidume no marcador, pero finalmente os de Miki López alzáronse cos tres puntos, ante a frustración dun Verín CF que se despide do soño da victoria no campionato e que dá un paso atrás nas súas aspiracións de ascenso. Unha derrota dolorosa que os homes de Iván González deberán dixerir o máis rápidamente posible para seguir loitando a morte nas nove xornadas que restan.