O VERÍN CF VENCE E CONVENCE.

Crónica VERÍN CF 2 (Eloy e Quini Cotarelo) - CD RAMIRÁS 0.

5ª xornada de Liga da Primeira Autonómica Galega (grupo IV).

Gran partido do Verín CF, que superou con goles de Eloy e Quini Cotarelo a un CD Ramirás que só aguantou o empate inicial durante o primeiro periodo, e apenas inquietou a meta de Piollo.


FICHA TÉCNICA

Polo Verín CF xogaron Piollo, Cote, Xurxo, David Ginzo, Padín, Iago Garrido (Luis Vilachá, min. 26), Pablo García (Mario, min. 77), Hugo, Eloy, David Lopezosa (Édgar, min. 89) e Quini Cotarelo (Jorge, min. 90).

Polo CD Ramirás xogaron Kevin, Cristian, Luis (Mauro, min. 69), Jairo (Carmelo, min. 75), Sierra, Alonso, Chechu (Ndiaga, min. 53), Germán, Jacobo, Iván e Alberto (Hugo, min. 61).

Arbitrou Juan Carlos García Domínguez, auxiliado por Juan Alberto Vázquez Martínez e Jorge Meno Garrido. Amosou cartón amarelo a Padín e Eloy, e máis ó axudante técnico Abel Afonso Cao (Verín CF) e a Jairo, Cristian, Luis, Alonso, Chechu, Germán, Alberto e Hugo (CD Ramirás).

Entrada aceptable no Arjiz tendo en conta as circunstancias meteorolóxicas: o terreo de xogo aguantou ben a choiva caída nos últimos días.

CRÓNICA

A eficacia contada en puntos segue sendo a mesma, pero é evidente que o Verín CF comeza carburar máis e mellor, pois non deu opción a un rival coma o CD Ramirás, empequenecido polo bo facer dos de Iván González. A baixa de última hora de Adrián Iglesias propiciou que fose Quini o home máis adiantado, e o artilleiro aproveitou a circunstancia para dar un auténtico recital, cun xogo primoroso que foi recompensado polo gol que sentenciou o partido. Pero máis aló de actuacións individuais, o Verín CF crece coma conxunto. Onte, coma sempre, saiu decidido na procura do primeiro gol, pero os de Ramirás contiveron o arreón inicial. A tempraneira lesión de Iago Garrido obrigou a Iván González a facer o seu primeiro cambio, replantexando a disposición táctica dos seus xogadores. O recén entrado no campo Luis Vilachá asumiu a posición de pivote, e o equipo notou o seu toque na medular. Mais, pese a que o tentaba o Verín CF, especialmente por banda dereita coas subidas de Cote, o equipo visitante conseguía desarticular as combinacións dos locais, cunha presión intensa e abundantes faltas. Faltaba unha pisca de intensidade nas xogadas de ataque verinenses, e foi tralo descanso, no minuto 46, cando Eloy, o xogador probablemente máis querido por Iván González polas moitas posicións que pode desempeñar no campo, inaugurou o marcador cun espléndido zurdazo dende fóra da área. O camiño da victoria xa estaba franco: o CD Ramirás non tivo poder de reacción e co paso dos minutos a súa impotencia transformouse nun orballo de amonestacións en forma de cartón amarelo. Cun Vilachá intachable coma director de orquestra, por dúas veces a conexión Hugo-Pablo García puido significar o segundo tanto. Pero este segundo gol estaba destinado a Quini Cotarelo, que no 89 culminaba unha rápida contra dirixida por el mesmo cun auténtico golazo, o primeiro coa camisola verinense.

Terminou sen maiores agobios o partido, coas mellores sensacións ademáis: os verinenses están a amosar unha notable progresión física, técnica e táctica que permite mirar con optimismo os vindeiros compromisos ante os -a priori- mellores rivais da categoría.

O VERÍN CF CUMPRE OS PRONÓSTICOS E VENCE EN ARRABALDO.

Crónica SDC ARRABALDO 0 - VERÍN CF 3 (Adrián Iglesias, Hugo e David Lopezosa).

4ª xornada de Liga da Primeira Autonómica Galega (grupo IV).

Con goles de Adrián Iglesias, Hugo e David Lopezosa, o Verín CF levou os tres puntos en xogo ante unha voluntariosa SDC Arrabaldo. Os de Iván González impuxeron a súa calidade e mesmo se permitiron errar dous penaltis. O Verín CF segue nos primeiros postos da táboa.

FICHA TÉCNICA

Pola SDC Arrabaldo xogaron Marcos, Carlos (Javi, min. 74), Brais, Pika, Pablo, Héctor, Óscar, Gustavo (Víctor, min. 80), Nóvoa, Hugo González e Bruno (David, min. 62).

Polo Verín CF xogaron Jorge, Cote, Xurxo, David Ginzo, Padín, Iago Garrido, Luis Vilachá, Hugo, Quini Cotarelo (David Lopezosa, min. 65), Unai (Eloy, min. 55) e Adrián Iglesias (Suso, min. 87).

Arbitrou Iago Grande García, auxiliado por Cristina Prado Vázquez e Abel Moure Álvarez. Amosou cartón amarelo a Xurxo, David Ginzo e Adrián Iglesias (Verín CF) e a Óscar, David e Nóvoa, que foi expulsado, igual que o adestrador local Diego Suances.

Entrada moi frouxa no campo do Seixo, propia dun domingo de verán.

CRÓNICA

A SDC Arrabaldo, último clasificado sen estrear o seu casilleiro de goles e puntos, presentábase coma un rival asequible, e os verinenses, que en teoría xogan noutra liga, amosaron na práctica a súa superioridade. O intenso inicio do Verín CF propiciou un tempraneiro gol de Adrián Iglesias, tras unha contra dirixida por Hugo, que rachou o partido ás primeiras de cambio. Era o minuto 9 e, coa SDC Arrabaldo desorientada, no minuto 14 Unai provocou un penalti que foi errado por Quini Cotarelo. Semellou dar ánimos ó rival esa circunstancia, porque dunha posible goleada a domicilio pasouse a un partido de máis traballo e equilibrio. Sen xogo fluido por parte de ningún dos dous combatentes, só nos minutos 25 e 26 ámbolos dous equipos disfrutaron de sendas ocasións para marcar, pero o partido volveu diluirse baixo a intensa calor reinante.
 
Tralo descanso, saiu o Verín CF impetuoso co propósito de despachar o partido, e Adrián Iglesias puido facer o segundo tras gran centro de Unai, que pouco despois tería que retirarse do campo, renqueante do seu nocelo. Do paso dos minutos e do consecuente cansancio dos xogadores tirou máis rédito o Verín CF, que puido impor de xeito máis claro a súa calidade individual. No minuto 63 Marcos detivo unha chilena de Quini Cotarelo, que procuraba resarcirse do seu penalti errado. Pouco despois, no 73, era Eloy o que dispuña doutra clara ocasión, pero a vaselina fóiselle fóra. Non chegaba a sentencia, pero tampouco os azulóns eran quen de chegar con perigo á meta de Jorge. Finalmente, os últimos dez minutos de partido foron definitivos: no 84 a SDC Arrabaldo quedaba con dez trala expulsión de Nóvoa, e no 86 Hugo aproveitaba unha perda de balón no lateral para pór o balón na escadra de Marcos cun toque delicado pero mortal. Finalmente, outro penalti sinalado polo árbitro deixaba franca a sentencia; esta vez foi Luis Vilachá o que errou a pena máxima pero David Lopezosa, atento, remachou á rede subindo ó marcador o definitivo 0-3. 

Acabou o partido e o Verín CF volveu con tres puntos máis na súa saca particular e suma xa dez de doce posibles. Na vindeira xornada visita o Arjiz o CD Ramiráns, antesala dun mes de outubro que, con enfrontamentos coa UP Taboadela, CD Arenteiro e Ponte Ourense CF, promete ser clave no devenir próximo da competición.

O CD ALLARIZ SACA UN PUNTO ANTE UN MERMADO VERÍN CF.

Crónica VERÍN CF 0 - CD ALLARIZ 0.

3ª xornada de Liga da Primeira Autonómica Galega (grupo IV).

Empate sen goles onte no José Arjiz. O Verín CF, moi mermado físicamente e escaso de efectivos, non puido cun bo CD Allariz que xogou ben as súas armas e disfrutou de boas ocasións ó contrataque. No arreón final, o Verín CF puido mesmo gañar, pero finalmente non se moveu o 0-0 inicial, que deixou relativamente satisfeitos ós dous contendentes.

FICHA TÉCNICA

Polo Verín CF xogaron Piollo, Cote (Luis Vilachá, min. 46), David Ginzo, Xurxo, Eloy (Padín, min. 46), Iago Garrido, Hugo, Quini Cotarelo, Pablo García, Unai e Adrián Iglesias.

Polo CD Allariz xogaron Cote, Corbi, Bernardo, Miguel (Muñiz, min. 85), Maxi, Iván, Txoli, Coello (Rubén, min. 75), Beto (Aitor, min. 85), Paco e Sergio.

Arbitrou Coello González, asistido nas bandas por Lucía Varela e Pablo Crespo. Amosou cartóns amarelos a Padín e Vilachá (Verín CF) e aBernardo (CD Allariz).

Uns 200 espectadores asistiron ó partido. Nos prolegómenos do encontro os dous equipos fixéronlles pasillo ós rapaces do equipo infantil de fútbol sala das Escolas Deportivas Munciipais que acadaron o subcampionato de España.

CRÓNICA

Non xogou ben onte o Verín CF e mesmo acompañouno a sorte nalgúns momentos do partido, ó erraren os alaricanos ata tres claras ocasións de gol. Pero hay que salientar que o equipo de Iván González estaba moi mermado de forzas, con moitos lesionados e con xogadores que participaron, nunha mostra de gran compromiso co equipo, ó límite das súas forzas: Pablo García con gastroenterite, Unai tocado no xeonllo, Luis Vilachá non recuperado plenamente do seu esguince de nocelo…  Sexa como fora, o partido comezou cun Verín CF intenso, ante un CD Allariz algo timorato: é evidente que o Arjiz impresiona e os adversarios visitan con moito respeto a praza verinense. Adrián Iglesias, Quini e Unai puxeron a pimenta nestes primeiros minutos, pero pouco a pouco o CD Allariz quitouse de enriba a presión dun Verín CF que non acababa de sentirse cómodo no campo. No ecuador da primeira parte unha internada de Corbi acabou cun centro chut que deu no longueiro da meta de Piollo: foron os mellores minutos do CD Allariz, que gañaba claramente a partida no medio do campo. Coello no minuto 28 mandou fora por pouco dende a frontal, e no 37 foi Piollo o que, extraordinario, salvou ó seu equipo cunha espléndida parada ante Txoli, tras un rápido contragolpe. Visto que o seu equipo carecía da claridade de ideas e a frescura física para combinar rápido e con criterio, Iván González ordenou ós seus que xogaran dun modo máis directo, buscando con balóns longos a Adrián Iglesias.

Tralo descanso o técnico verinense modificou a liña defensiva, dando entrada a Padín por Cote e retrasando a Pablo García á posición de lateral diestro, e fortaleceu  a medular metendo no campo a Luis Vilachá: a súa entrada deu máis sentido ó xogo verinense que, pese a non terminar de combinar ben, si tivo máis control do balón. No minuto 58 un gran balón de Unai pola dereita habilitou a Adrián Iglesias, que enviou fóra cando a bancada xa cantaba gol. A presión do CD Allariz baixou algún enteiro e os mediocampistas verinenses, especialmente Quini Cotarelo co seu xogo entre liñas, sentíronse máis cómodos. Un par de ocasións verinenses consecutivas nos minutos 65 e 66 motivaron a reacción dende o banquiño de Alberto Tamayo, que introduciu a Rubén por Coello para recuperar a contundencia perdida. O CD Allariz regresou ó partido cunha gran ocasión de Paco, que volveu salvar Piollo. O partido avanzou cara o seu treito final cun Verín CF que empezou notar en exceso os problemas físicos dos seus xogadores. Os alaricanos, sentindo que a súa falta de pegada non lles permitía aspirar á victoria,deron o visto bo ó empate, e o Verín CF aproveitou o pasiño atrás dos alaricanos para protagonizar un arreón final que puido desnivelar o marcador, pero o final chegou cun empate que fixo xustiza ós méritos de ámbolos dous equipos.

O Verín CF acadou así un punto que dadas as circunstancias, non semella ser mal botín. Os verinenses manteñen a cero a súa meta por terceira xornada consecutiva, e, cuartos na clasificación, suman sete puntos en tres partidos. O vindeiro domingo será a S Arrabaldo quen medirá a progresión física e técnica do equipo de Iván González.

O DERBI CAE DO LADO DO VERÍN CF.

Crónica CF MONTERREI CF 0 - VERÍN CF 1 (Unai).

2ª xornada de Liga da Primeira Autonómica Galega (grupo IV).

O VERÍN CF SAE AIROSO DA LOITA.

Pouco fútbol no céspede  e moita paixón na bancada é o resume do vivido onte no campo de Rozavales. Os homes de Iván González souberon xogar o partido físico e trabado que lle plantexou o CF Monterrei, e levaron os tres puntos en disputa grazas a un golde Unai de falta directa.

FICHA TÉCNICA

Polo Verín CF xogaron Jorge, Pablo García, David Ginzo, Xurxo, Mario (Padín, min. 29), Iago Garrido, Hugo (Cote, min. 91), Quini Cotarelo, Unai (David Lopezosa, min. 58), Saúl Arias (Eloy, min. 46) e Adrián Iglesias.

Polo CF Monterrei xogaron Fabián, Pachi, Fréderic (Iago Lantes, min. 46), Tractor, Iván Teixeira, Breixo, Oguin, Iván Gas, Adán, Pedro (Carlos, min. 75) e Alexandre (Mauro, min. 65) .

Arbitrou Alberto Ruibal, asistido nas bandas por Alejandro Bernárdez e Adrián Vila. Amosou cartóns amarelos a Fréderic, Iván Teixeira, Iván Gas e Mauro (CF Monterrei) e a Pablo García, David Ginzo, Adrián Iglesias, Hugo e David Lopezosa (Verín CF).

Gran entrada no campo de Rozavales, cuns 300 espectadores que non se quixeron perder a redición dun derbi inédito dende hai vinte anos.

CRÓNICA

Foi o de onte un partido escrito baixo o típico guion dos derbis: pouco fútbol e moita loita. Saiu o Verín CF cun debuxo dun 4-1-2-3, coas novidades de Jorge na portería, Pablo García na posición de lateral dereito, Quini Cotarelo na mediapunta e o debutante Adrián Iglesias en vangarda. Foi fulgurante o inicio dos verinenses, que volcaban o xogo cara a súa banda esquerda, onde Unai encaraba sempre con perigo. Pero tras unhas primeiras ocasións fallidas do Verín CF, o CF Monterrei sacudiuse o dominio visitante e prantou cara. Unha dura batalla desatouse entón no centro do campo sen que ninguén puidese tomar verdadeiramente o control do partido. Nun campo de estreitas dimensións coma Rozavales, e con tantos xogadores na parcela central, era difícil ter unha posesión limpa, e sucedeuse un continuo rosario de pérdidas e recuperacións, en medio dun gran desplegue físico por parte dos xogadores de ámbolos dous conxuntos. Ademáis, o choque de forzas derivaba en faltas que se convertían en perigosos centro á área. Neste contexto, o CF Monterrei, máis acostumado a este xogo, buscou con intención desprazamentos longos de balón cos que sorprender a Jorge: Iván Gas dende fóra da área foi o home que con máis ahinco procurou a meta verinense, pero o gardarredes visitante, moi seguro todo o partido, non pasou por verdadeiros problemas. 

No minuto 30 –un pouco despois de ser sustituido Mario por lesión- un penalti a Quini de Frederic semellaba que ía facilitar as cousas ó Verín CF, pero o pao escupiu o disparo dende os once metros de Adrián Iglesias, polo demáis moi activo e batallador no seu debut coa camisola verinense, igual que Quini Cotarelo, dous xogadores dos que cabe esperar moitas alegrías nesta temporada. Continuou a mesma dinámica de xogo, cun xogo moi físico e trabado, con faltas que se convertían en centros á area na procura dalgún remate franco a portería. Pero foi no minuto 45 cando unha falta executada por Unai na frontal atopaba a rede, facendo inútil a estirada de Fabián. Era o 0-1, xusto antes de silbar o árbitro a fin da primeira parte.

Tralo descanso, movéronse os banquiños: no Verín CF Eloy saiu por Saúl Arias para fortalecer a medular; no CF Monterrei foi da partida Iago Lantes, na procura de maior vericalidade en ataque. Pero a intensidade dos primeros 45 minutos foi apagándose progresivamente, do mesmo xeito que se apagaba a fe do CF Monterrei en acadar un resultado positivo. O Verín CF, que perdeu profundidade trala lesión de Unai no minuto 58, xa tentou contemporizar o máis posible, satisfeito do botín acadado. Iván González desgañitábase dende o banquiño para que os seus xogadores mantivesen a intensidade defensiva, pois as deslabazadas aproximacións á área dos de Albarellos aínda puñan algo de incerteza no marcador. Pero nada foi suficiente para que os locais foran quen de empatar o partido.

Pitou o árbitro o final. O Verín CF saiu airoso dun partido complicado nun campo difícil, e suma dúas victorias nos dous primeiros partidos de liga, amosando ademáis unha boa capacidade de adaptación ás esixencias da categoría.

SUFRIDA VICTORIA PARA COMEZAR

Crónica VERÍN CF 1 (Unai)- FC ANTELA 0.
1ª xornada de Liga da Primeira Autonómica Galega (grupo IV).

        Na imaxe, Unai executando unha rabona (foto Verín CF).

CAEN OS PRIMEIROS TRES PUNTOS NO CASILLEIRO DO VERÍN CF.

Valiosísima victoria do Verín CF por 1-0 na cita inaugural do campionato de Liga. Os homes de Iván González amosaron que aínda lles falta para chegar ó nivel esperado, pero aínda así foron quen de dobregar a resistencia dun serio FC Antela que exemplificou á perfección a gran competitividade que vai existir este ano na Primeira Autonómica.

FICHA TÉCNICA

Polo Verín CF xogaron Piollo, Cote (Padín, min. 68), David Ginzo, Xurxo, Mario, Iago Garrido (David Lopezosa, min.61), Luis Vilachá, Hugo, Eloy, Pablo García (Saúl Arias, min. 84) e Unai.

Polo FC Antela xogaron José Rodrigo, Iago Campelo, Alberto Rodríguez (Imad, min. 76), Marcos Meixeira, Enrique, Manu Estévez (Jaime, min. 71), Samuel, Iván Cabrera (Manuel Luis, min. 79), Fali Castro (Brais Quintas, min. 15), Ignacio Feijoo e Toni Sánchez (Dani, min. 61).

Arbitrou Juan Alberto Vázquez Martínez, asistido nas bandas por Eladio González Otero e José Manuel Pérez Argos. Amosou cartóns amarelos a Iago Garrido (Verín CF) e a Marcos Meixeira, Imad e Brais Quintas (FC Antela).

Uns 200 espectadores asistiron ó partido, xogado baixo unha intensa calor. Nos prolegómenos do encontro gardouse un minuto de silencio na memoria de Alberto Yurrita, exadestrador do Verín CF recentemente falecido.

CRÓNICA

Sumar os tres primeiros puntos era o prioritario do Verín CF, por encima de calquera outra circunstancia, e felizmente para os verinenses, cumpriuse o obxectivo. Obrigado Iván González a situar ó polivalente Eloy na dianteira debido as baixas de Fran Martínez e Quini Cotarelo, a primeira aliñación do asturiano serviu para deixar claro o que será o seu debuxo táctico preferente, un 4-3-3, cunha parella de centrais (onte Xurxo e David Ginzo) e dous laterais de querencia ofensiva (Cote e Mario); un pivote (Iago Garrido), dous mediocampistas de creación (Luis Vilachá e Hugo), uns extremos moi abertos (Pablo García e Unai) e un punta (Eloy). 

Co triste protagonismo dun lume ardendo nas laderas do monte da Pousa, non lonxe do José Arjiz, empezou levando a iniciativa o equipo local, ante un precavido FC Antela que nos primeiros compases concentrouse en protexer a súa área pechando ben os espacios e que tivo que sufrir a tempraneira lesión de Fali Castro, sustituido por Brais Quintas. Unai e Pablo García, moi dinámicos, tentaban abrir o campo na espera dalgún bo balón diagonal dende a parcela de creación, pero as aproximacións en ataque dos verinenses, tanto polo centro coma por bandas, non tiveron consecuencias. No minuto 21 foron os limianos os que quixeron amosar que non viñan de mera comparsa ó Arjiz, e Piollo tivo que esforzarse a fondo para desviar a córner un tiro de Manu Estévez tras boa internada. Os dous equipos semellaron tomarse un respiro ante a intensa calor reinante, e non houbo xogadas de especial mérito ata os minutos finais, cando Unai centrou dende liña de fondo cunha preciosa rabona sen atopar rematador, ou cando o branquinegro Samuel protagonizou unha preciosa xogada personal que culminou cun disparo que se foi alto sobre a meta verinense. Pouco máis tarde terminaba a primeira parte, sen que ningún dos dous equipos tivera feito méritos suficientes para adiantarse no marcador.
 
O descanso sentoulle ben ó equipo local, que na segunda metade gañou en intensidade de xogo. Os antelanos, menos frescos que ó principio do encontro, perdían por momentos a orde defensiva que exhibiran no primeiro periodo, e comezaron sufrir ante un Verín CF que se fixo dono do balón sen discusión, cun Luis Vilachá coma claro director de orquesta. Iván González sentou no minuto 61 ó seu mediocentro, Iago Garrido, para pór no campo un dianteiro nato, David Lopezosa, que loitou ben nas posicións de vangarda. A posesión local comezou dar os seus froitos, e Hugo avisou no minuto 63 cun gran latigazo, e finalmente foi Unai no 67 quen tras un centro dende a dereita e unha serie de rexeites na área, metía a bota para facer o 1.0. A partir de aí viuse obrigado o FC Antela a dar un paso adiante e moveu o banquiño Gonzalo Opazo, pero os branquinegros non se sentiron cómodos no papel que o partido lles esixía. A zaga local, liderada por un imperial Xurxo e na que entrara de refresco Padín por Cote, non sufriu apenas, e os locais mesmo disfrutaron dun par de contragolpes perigosos que puideron transformarse no 2-0. O último arreón dos antelanos levou non obstante o susto a grada, pero o gol de Dani no tempo de desconto foi anulado por fóra de xogo. Silbou o árbitro o final do partido. Os mecanismos da nave verinense teñen que se engrasar todavía, pero nada mellor que facelo co vento a favor que supoñen estes primeiros tres puntos da temporada.